Archive for the ‘tradicions’ Category

Trimestre de cuentos

3 de abril de 2017

Ya se uloran las vacancias y per aquí son rematando lo que queda de fayenas de primaria. Este trimestre hen troballau con la tradición oral d’es nuestros lugars. Hen aprestau ilustracións d’es cuentos que se feban en tiempos en las cadieras, mirando de recuperarlos. Como podez viyer, tenén una ripa d’artistas en las escuelas. ¡Asperán podezos dar més noticias d’este proyeto en poco tiempo!

El pase de diapositivas requiere JavaScript.

Anuncios

San Antón de cartón

24 de enero de 2017

La semana pasada va estar la fiesta de San Antón. En la val de Chistau van salir es trucos a las carreras de toz es lugars a fer callaguar, a pesar d’es volturnos y la fredor. En clase es borches d’infantil tamién se van fer uns trucos, pero estes de cartulina. A pesar de ferlos sin batallo ta que no sonasen, ¡ya se van encargar els de foter buena tarramotera!

La mansión de Josephine

25 de octubre de 2016

Este viernes tenén encuentro de convivencia en Plan de todas las escuelas. Farén tallers y chuegos con la temática de Halloween, que ye bien motivadora ta las luengas en clase.  De tardes, es borches més grans tendrán la oportunidá de vesitar la mansión de Josephine, una nina que va vivir fa més de 100 años en Plan, y que naide sabe que va estar d’ella. ¿La trobarán?

Este chueves, el chistavín en ¡Bien dicho!

27 de febrero de 2013

El programa ¡Bien dicho! de Aragón televisión va estar per la val de Chistau ta’s diyas de San Antón, y este chueves emitirán un capitulo dedicau al chistavín. A las 21:30 contarán como ye el vestiu tradicional, enseñarán el queso de Saravillo, rondarán con es trucos… Y tamién se pasarán per la escuela de San Chuan. ¡A viyer si salín guapos!

Chistén

Enronaus de nieu

16 de enero de 2013

Ayer va estar un diya complicau ta’s que nos toca rodar de lugar en lugar a dar las nuestras clases. Con el nevazo que va cayer, a viyer qui yera el guapo que puyaba ta Chistén dinantes de que pasase el quitanieus… Pos yo, ¡que se veye que me fa goi esvolotarme en la nieu con el coche!

A la fin va estar una cursa bien pincha, y se me va pasar pe’l crabazín de grabarlo con la camara, anque ya baixando, que la carretera yera una miqueta més limpia dimpués de pasar la maquina (anque no’l paixca).

Maitín, y con este panorama, tenén San Antón. Caldrá mirarse belas moletieras ta marchar a trucar per las carreras. Es ninos esta tarde ya ensayaban y afinaban, ta que maitín vayán toz al mismo son. Tot será que con ixe talaquerío nos caiga bel tempanal d’es tellaus…

San Chuan

¿Halloween? No, la noche de las animas

29 de octubre de 2012

Ya lleván uns años que s’ha metiu de moda la celebración de Halloween ta’s ninos (y es no tan ninos). Que si se disfrazan, que sin replegan lamins, que si se fan crabazas con velas dentro… Total, que resulta que bela cosa d’ixas ya se feba per es lugars del Somontano ta toz es santos. El mierqueles en Radiquero tornan a celebrar la noche de las animas, con las suyas almetas, con es suyos totons y con las suyas crabazas, que no faltan.

Nusatros hen aprovechau las suyas historias ta conoixer las costumbres que i heba per ixes puestos, y de paso, chugar a una especie de chuego de la Oca que han feto con las almetas. A la fin resultará que la fiesta ixa de Halloween tamién ye nuestra. Per si ancaso, les he dicho a’s borches que pregunten en casa a’s suyos güelos, a viyer que cosas podén conoixer de lo que se feba per aquí: cuentos, costumbres,… No tot tiene que estar lo que nos traigan es ingleses u americanos…

Ya ye carnabal!

13 de febrero de 2012

Per estas bals fa diyas, que ya s’han pasau es de Chistén y de San Chuan.

Muyén

El muyén de Chistén

Agora tocan es de Bielsa, pero ixes este año se tornan internazionals. La escuela activa Ermilo Abreu Gómez de México han contactau con nusatros ta fer el carnabal como es d’aquí. Se bei que les ba fer goi lo que bon troballar el zaguer curso!

Y cuento contau…per la chubinera se ha escapau!

28 de junio de 2011

Nos ne bon de bacazions, sí, pero no nos podeben dir sin fer una miqueta de despedida. Bon emplegar belas falorias d’ixas que se feban al canto del fogaril ta fer comedia con moñacos de papel. A biyer si ta la proxima bez tiengo tiempo ta fer-ne belún más, que “L’arangután de las Paniellas”, “El sastre y el muixón” y “El chanrrualla” ya han nabegau per casi tot el Sobrarbe. 😛

El pase de diapositivas requiere JavaScript.

Buen berano y no pasez guaire calor.  A biyer si nos tornán a trobar luego per estas bals!

El que zierne y masa…

14 de junio de 2011

…de todas l’en pasa!

Son aprestando con es de primaria unas obretas con cuentos que se’han feto toda la bida per estes lugars. En las prebatinas de Sarabillo bon tener un problema con es decoraus, que se bei enca no teneban prou apegaus es ganchos an se teneban. Astí ye el bídeo:

Cal que no pase esto cuan fayán las representazions!

Carnabals caducaus

27 de abril de 2011

Mira que son largos es carnabals en el Sobrarbe y ni an asinas, me ha bagau de fer esta entrada a tiempo. Estes meses de dezaga nos hen feto uns librez con toda la chen que amanixe per es carnabals de Bielsa y Chistau. En i hai un rabaño! Per ixo no bon rematar la fayena basta casi Semana Santa…

El pase de diapositivas requiere JavaScript.


A %d blogueros les gusta esto: