Archive for 24 junio 2016

Chicoz artistas en 1º

24 de junio de 2016

Tos meto fotos d’es debuixos que han ganau dos alunnos míos en el XXIV Concurso Comarcal de Sobrarbe. ¡Norabuena, Lizar y Adam F! Tamién cal felicitar al resto de borches, que anque no han ganau, el suyo esfuerzo les ha valiu un chiquet detalle de la comarca. Estas cosas fan goi a saberlo. 🙂

SANYO DIGITAL CAMERA

SANYO DIGITAL CAMERA

Ya en casa

21 de junio de 2016

Dimpués de un cabo de semana una mica ocupau, ya son atra vez en la rutina. Si podén decir rutina a’s zaguers diyas de curso. 🙂

Ayere va estar un diya largo, con la entrega de premios del Festival de Cine de Valencia, y aparte tener que tornar dende alí ta L’Aínsa. El primer premio de la categoría A, en la que participaban la escuela de Fiscal y la De San Chuan, va dir a parar al CEIP El Crist de Meliana (Valencia) con “Amor mortal”. L’acesit el va conseguir el CRA Sella-Orxeta-Relleu de Alicante con “Xssst”.

Es dos años anteriors no heben puisto acudir al festival, pero estiaño sí, y la esperiencia ha estau buenisma. Gran organización, que amés nos ha tratau como si fuesen en casa. Fa goi que troballos fetos en escuelas chicotas de Sobrarbe haigan estau al mesmo nivel que es de centros més grans y con més recursos. Y en el caso del curto de San Chuan, viyer que se proyeta chunto con atros en atras luengas como catalán, gallego, valenciano u euskera ye un argüello. Sobre tot pensando en que el nuestro “Cine en aragonés” se fa con una hora a la semana de clase…

En fin, que la custión ye que l’año que viene podián tornar. 🙂

Esperiencias escolars destacadas en l’Heraldo escolar

15 de junio de 2016

No sabez la ilusión que fa viyer que el troballo que se fa en las aulas tienga repercusión difuera. Un año més, el suplemento escolar de Heraldo de Aragón s’ha alcordau de nusatros en su especial de esperiencias escolars de cabo de curso. Astí podez viyer mencións a las atividaz fetas en es tres centros que he troballau es zaguers cursos en Sobrarbe: CEIP Asunción Pañart, CRA Alto Ara y CRA Cinca-Cinqueta. ¡Mersi!

El pase de diapositivas requiere JavaScript.

 

Rematando el curso

13 de junio de 2016

En el cole de L’Aínsa cal acabar las clases d’aragonés en mayo per temas de trasporte con la chornada intensiva. Encá con ixas, estes diyas a ratos son rematando es curtos que hen aprestau en estes trimestres ta’l proyeto “Cine en aragonés”. Estiaño, amés, nos complicán més la vida con ténicas nuevas de grabación. Ta tener es problemas que tenén de saturación y de falta d’espacios en el centro, encara nos hen puisto apañar.

¡Tocará mallar este verano ta que en uns meses podián fer es estrenos!

01

Cursa a l’ecomuseo de L’Aínsa

1 de junio de 2016

Este maitín la mainada de 1º hen marchau de vesita a l’ecomuseo de L’Aínsa. Son estudiando es sers vivos, con lo que no podeben deixar pasar la oportunidá de dar una golteta per este espacio de la “Fundación para la Conservación del Quebrantahuesos“. Alí nos han esplicau abundáns cosas sobre las aves rapaces, y basta hen puisto oservar unas cuantas vivas. De camín ta’l museo tamién nos hen parau a mirar el paisache y nos hen puyau a la navata del castiello. En i hai belún que se le veye buena traza, asinas que en uns años igual el tenén baixando pe’l río… 🙂

El pase de diapositivas requiere JavaScript.

 


A %d blogueros les gusta esto: