Archive for 29 abril 2016

Un vídeo d’Abizanda

29 de abril de 2016

Colgán un vídeo con un resumen de la nuestra estancia en Abizanda.

Abizanda: Fer chuntos un diya d’escuela

26 de abril de 2016

Ayere von estar en Abizanda con toz es atros centros que imparten aragonés en infantil y primaria. Von pasarlo de pistón con Dragoncio y es Titiriteros de Binéfar. Amés von vesitar el suyo museo y l’atalaya. Ta rematar la chornada, von deixar escritas parolas en aragonés per toda la era de la casa d’es titiriteros. Caldrá repetir…

El pase de diapositivas requiere JavaScript.

Y el Diya de las Luengas va arribar

21 de abril de 2016

Entre el maitín y la tarde hen feto las atuacións d’aragonés en el Diya de las Luengas del CEIP Asunción Pañart de L’Aínsa.

Hen cerrau el festival del cole con “As princesas y as campesinas”, una historia que se van inventar las ninas de 5º y en la que s’han feto es vestius. La verdá ye que ha quedau bien maja. Con atrices tan buenas…

De tardes hen contau un cuento ta’s borches d’infantil, “A rabosa y a berigüeta”. Nos ha aduyau Olga y la suya clase de cuatro años, qu’han feto un ixambre d’abellas estupendo.

Tos deixán tamién l’álbum de fotos. ¡Norabuena pe’l troballo bien feto!

El pase de diapositivas requiere JavaScript.

Fer chuntos: Abizanda

20 de abril de 2016

El diya 25 d’abril nos achuntán toz es centros públicos de primaria qu’ofertan aragonés en la atividá “Fer chuntos Abizanda”. Organizau per la “Dirección General de Política Lingüística del Gobierno de Aragón” ye una chornada ta convivir es borches que estudian esta luenga en el Pirineo y ta conoixer las diferéns variedaz que forman l’aragonés.

Amés, podrén viyer “Dragoncio”, una obra d’es tititireros de Binéfar y vesitar el suyo museo, asinas como puyar ta l’atalaya d’Abizanda. ¡Seguro que pasán un diya de pistón!

Fer chuntos

Semana cultural de las luengas

18 de abril de 2016

Esta semana el CEIP Asunción Pañart fa una serie d’atividaz en torno a las luengas que se estudian en el cole. Nusatros farén unas obretas de teatro  con el grupo de 5º y 6º. Ya tos contarén que tal han saliu, pero de momento, ¡el vestuario promete!

Cuento

El cuerpo humano

14 de abril de 2016

Cuasi se nos pasa, pero la semana pasada von salir en el suplemento escolar del Diario del Alto Aragón. Este curso tamién me toca dar las Ciencias Naturals de 1º de primaria, y un d’es proyetos yera el cuerpo humano. Como el curso pasau va funcionar tan bien en Fiscal, he tornau a fer el mural del cuerpo humano. Y se veye que les ha feto goi en el periodico ta sacarlo. 🙂

El pase de diapositivas requiere JavaScript.

 

Sobrarbe que son dos días, un curto documental d’Espiello

13 de abril de 2016

Continamos con las atividaz d’Espiello. Ayere, gracias a’s responsables del festival, voi tener el placer de charrar con Violeta del Río, una de las responsables del proyeto ganador del Siñal Espiello Chicorrón. Con “Tierra animada“, a traviés de tallers d’animación troballan la alfabetización audiovisual en centros rurals d’Argentina. En la charradeta que von fer, von poder comprebar como puestos tan diferéns como Sobrarbe y estas escuelas, tienen més puntos en común d’es que te puez entrefilar: luengas minoritarias, escuelas unitarias, culturas propias,…

Atro punto de trobada de las nuestras clases con Espiello ha estau la inclusión de las mesmas en el curtometrache documental “Sobrarbe que son dos días”, coordinau per Juan Carlos Somolinos y con la colaboración de cuasi cincuenta vecins de la comarca. Si quies viyer lo que ye vivir en Sobrarbe, esta ye una buena oportunidá.

Un buen maitín de sabado

11 de abril de 2016

Como ya heben contau, el sabado yera el diya de las proyecións de la clica. Como siempre, un placer estar en Espiello, y més cuan acude el tuyo alunnau a acompañar la sesión de cine. ¡Mersi a toz es borches que van venir! 🙂

La seción Cachimalla se va completar con el proyeto “Tierra animada” qu’ha estau premiau estiaño con el Siñal Espiello Chicorrón, y con la pelicula “Song of the sea”.

El pase de diapositivas requiere JavaScript.

Ta rematar la entrada, tos deixán con l’avance que se va viyer en el festival de lo que son fendo en l’Asunción Pañart. ¡A viyer cuan s’estrena!

Semana de cine

7 de abril de 2016

Ye a punto de comencipiar Espiello, y la clica será presén per partida doble en el “XIV Festival Internacional de Documental Etnográfico de Sobrarbe”.

El viernes a las 19:15 horas s’estrena “Sobrarbe que son dos días“, un curto documental que nos contará la vida de la comarca seguntes l’han grabau la chen d’aquí. Las clases d’aragonés asomarán una miqueta el morro per alí.

El sabado, dentro de la seción Cachimalla, a las 11:00 tendrén “Cine en aragonés”. I habrá curtos de las escuelas de San Chuan, Saravillo, Bielsa y A Espuña. Amés, tamién se verán es que von fer en castellán en la escuela de Fiscal el curso pasau,  y en primicia, un trailer d’es que son aprestando este curso en la escuela de L’Aínsa. En total, troballos de tres escuelas de Sobrarbe en las que he teniu l’honor de troballar estes zaguers cursos. 🙂

L'Aínsa

Podez consultar toda la programación del Festival en la suya web y en el programa de la muestra. ¡I hai entretenimento ta ratos!


A %d blogueros les gusta esto: