Tot s’acaba…

Mutos ya’l sabez, pero per si ancaso, tos comento que en el curso 2013-2014 no continaré en el C.R.A. Cinca-Cinqueta. Han estau cuatro años que nunca olvidaré, segurament d’es millors de la mía carrera profesional, y tamién de la mía vida presonal. Trobaré falta ixes hibiernos que me entraba el sol de tardes pe’l balcón entre que viyebe tot San Chuan enronau de nieu. Trobaré falta ixes maitins con la carretera plena de nieu zancera puyando ta Chistén  a las 9 y fendo rota con el coche. Trobaré falta ixas semanas que no viyebas el sol perque no feba so que plever. Trobaré falta ixas nuez sin dormir ta rematar bel video o bel periodico d’es borches. Si trobo falta lo que se suposa que ye lo piyor, entrefilazos lo que me dolerá no poder disfrutar de lo millor d’A Espuña, Bielsa, Chistén, Plan, San Chuan y Saravillo: el país, la chent, la comida, es bichos, es míos compañers, es borches… A la fin, tot.

En chuniol voi refusar entrar en la lista de mayestros interinos d’aragonés de Sobrarbe deixando l’esamen en blanco. Va estar una mida de protesta que me va salir del alma en el momento. En es meses d’antes hebe vistas cosas que no me van fer mica goi con la traza de manullar la enseñanza de l’aragonés, y viyer lo que pediban en aquel esamen va estar lo que  me va fartar de tot. M’han deixau bien claro que importa més imposar una ortografía d’una asociación privada y ferse con el control de puestos en la almenistración, que pasarse per es centros escolars a viyer cual ye la realidat de la enseñanza de l’aragonés y cómo troballan es mayestros en es centros: sin medios, sin formación, sin materials y con un gran esfuerzo. A la fin, es zaforas, han quedau en evidencia.

Es cambios que s’han planteau estiaño en la enseñanza de primaria d’aragonés en es zaguers meses s’han feto sin contar con es mayestros de primaria. Se ha cacegau una oportunidat historica de meter l’aragonés dentro del curriculo de primaria en condicions d’igualdat. Sin embargo, s’ha presentau un documento que ye de risa, que no tiene en cuenta la edat y capacidaz d’es borches de primaria. Ye feto per chent que no ye profesional de educación primaria, y no s’ha quisto contar con es que levan dende 1997 fochando  en las escuelas per fer sobrevivir l’aragones como podeban. Tampó s’ha contau con la chent d’es lugars, mirando d’imposar unicament una norma ortografica que no nos choca, y menos agora visto lo visto. No s’ha contau ni con centros, ni con mayestros, ni con familias ta viyer la posibilidat de darle un minimo de dinnidat a la enseñanza de l’aragonés. Se veye que lo que importaba yera el interés de chent d’una asociación privada ta colocarse.

Podrán fanforriar de que han feto plazas nuevas ta enseñar aragonés: plazas de 6 horas que no te dan ni ta comer, u plazas como la nueva de Broto, que la sacan decindo que no ye de Sobrarbe. Igual les caldría mirarse un mapa… Si dinantes teneben una lista d’aragonés, agora resulta que ta enseñar lo que els dicen que ye lo mesmo, han feto cinco listas ta cuatro gatos que son en esto. Si ixe ye el futuro de l’aragonés, a yo que no m’esperen. Continaré charrando en chistavín con la mía familia, amigos y vecins, que ixa ye la traza de conservarlo y dinnificarlo. Lo mesmo tos digo a toz vusatros. No deixez que tos roben la vuestra luenga cuatro esvagaraus que se piensan que’l saben tot y no veyen lo que i hai: l’aragonés se muere, entremistanto els luchan per viyer con qué ortografía escriben l’epitafio en la fuesa.

Anuncios

9 comentarios to “Tot s’acaba…”

  1. COCO CASTILLO CASTILLO Says:

    No te apures…….. No solo acabarán con esto acabaran con to. Animo y un abrazo.

    Enviado desde Nokia lumia ________________________________

  2. Miguel Anchel (@mabarcos_) Says:

    Sinto muito que este curso venient no estés en Sobrarbe fendo as clases, a faina tuya creigo que ha estau sobrebuena, y no conoixco a no dengún que se piense que no has feito un buen treballo.
    De todo o que cuentas, pues bi’stá cosas en as que puedo estar d’acuerdo y otras en que no, que creigo que ye lo normal, ixo d’as adhesions increbables no ye d’estar sincero.
    O que yo te pediríai ye que no dixes de fer fayena, estés en do t’estés, dende l’ambito que siga, porque aún nos ne queda muito camín que caminar, y a tu tamién.
    Un abrazo

  3. La clica Says:

    Faré lo que pueda fer. Lo que tiengo claro ye a quí no quiero tocar ni con un tocho en el mío troballo…

  4. Anchel Says:

    sé cómo e per qué no estarás ya en Cinca-Cinqueta e quiero dicir-te que ta yo has estau un eixemplo d’honestidat…lo siento per tul per os zagals e per l’aragonés, que pareix que se troba en mans de c hen impresentable, e no me refiero solo que a PPPAR, como ya puez comprender. Salut e un abrazo solidario.

  5. mjosgiron Says:

    ¡Ánimo dende Ribagorza! No mos conocem pero fa tiempos que te sigo y é una pena que tiengas que marchar. Gracias per ixes cuatro años!!!

  6. Uno Says:

    Muita suerte en futuros quefers. Grazias por a franqueza en que charras, creigo que muita chen ya prenzipia a beyer que más que chuntos, cada día somos más luen y más trestallaus. Quitate tu pa ponerme yo.

  7. Artículo de opinión de Javier | Sobrarbenses Says:

    […] Hace unos días Javier Vispe sacó una una entrada en el blog de La Clica sobre las razones de su marcha y las manipulaciones que está habiendo con las plazas de aragonés. La Clica es un blog en Aragonés que lleva él. Javier ha ganado varios premios en diferentes apartados por su trabajo. Como ya sabéis él ha sido maestro durante unos años en el CRA Cinca-Cinqueta que tiene su sede en Plan y con anterioridad en el Asunción Pañart de Aínsa. Quiere compartir con los lectores su artículo. Os lo dejo en este enlace. […]

  8. Javier A. Says:

    Te deseo mucha suerte que todo se solucione y piensen un poco más los que están arriba y no tomen decisiones desacertadas.

    Un abrazo.

  9. isabelbornaopicazo Says:

    Es verdad esas pabras salen de muy adentro.yo yevo mas de una ventena viviendo en san chuan me siento afortunada desaver esa poca o mucha fabla qe s lo largo de los años he aprendido me siento orguyosa de poder charrarla con chen del luga como en familia es algo we sale de dentro sin qerer incluso en el travajo aunqe bo me entienda lo qe charro pero la primera charrada o palabra es en chistabin.no deveriamos de perder esta raiz del chistavin otrod pueblos no lejanos nadamas lo saven los guelos y es zagals ya ni contar.

deixa unas parolas

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s


A %d blogueros les gusta esto: