Archive for 28 enero 2013

El diploma de finalistas del Festival de Cine de Zaragoza

28 de enero de 2013

L’atro diya nos va llegar el diploma de finalista que le van dar al curto de “La cursa del submarino” fa uns meses en el I Certamen Encuentro de Escolares del Festival de cine de Zaragoza. El meto aquí ta que’l veigaz.

Diploma

Anuncios

Las viladas ta’s borches de la val de Chistau

23 de enero de 2013

Este viernes tenén la tarde ocupada en Chistén. La Chunta Cultural Las Fuents nos fará un chicolate con torta ta brendar toz es borches de la val, acompañaus d’es suyos pais, mais, payes, mayes… y tot el que quiera acudir.  Dimpués es més güelos nos farán bel cuentet d’ixes d’antes, ta seguir con la peliculeta que hen feto en las escuelas. No tos pensez que serán solo las historias de la fin del curso pasau, que agora va tot ligau con atuacions d’es escolanos de primaria entre medio. Veniz a viyerlas, que de seguro tos ne redirez. Ta rematar la tarde, podrén viyer la pelicula “Arthur y es minimoys”.

Ya’l sabez, si querrez calentar el cuerpo este viernes, puyázosne ta la casa del lugar de Chistén. Alí tos esperán. Per cierto, que esta ye la entrada numero 100 en el blog. Qui’l diría que iben a dar tanta guerra…

 

Cartel

Enronaus de nieu

16 de enero de 2013

Ayer va estar un diya complicau ta’s que nos toca rodar de lugar en lugar a dar las nuestras clases. Con el nevazo que va cayer, a viyer qui yera el guapo que puyaba ta Chistén dinantes de que pasase el quitanieus… Pos yo, ¡que se veye que me fa goi esvolotarme en la nieu con el coche!

A la fin va estar una cursa bien pincha, y se me va pasar pe’l crabazín de grabarlo con la camara, anque ya baixando, que la carretera yera una miqueta més limpia dimpués de pasar la maquina (anque no’l paixca).

Maitín, y con este panorama, tenén San Antón. Caldrá mirarse belas moletieras ta marchar a trucar per las carreras. Es ninos esta tarde ya ensayaban y afinaban, ta que maitín vayán toz al mismo son. Tot será que con ixe talaquerío nos caiga bel tempanal d’es tellaus…

San Chuan

El malur de las mulas

14 de enero de 2013

Cuentan que fa tiempos i heba una casa mui rica. Teneban muchas caballerías en las suyas bordas, pero toz es años, la nuet de la misa de gallo, se les moriba la millor mula. Fartos de aquel esconchuro e sin saber que fer , un criato se quedó amagato dezaga de un truxato a viyer si podeba saber que pasaba ixa nuet.

Malur01

Al rato amanixió un gato negro, que aspaciet, s’arrimó ta una mula e se’n puyó ta la suya lomera. El criato sintió que el mixín deciba:
– Ya’l siento pobreta, pero no tiengo mes remedio que matarte…
Alabez, d’un blinco, l’hombre salió del amagadero. Prenió un tocho e le soltó un cinglazo al gato en la pata. La mula se salvó, encara que l’altro animalot podió escapar.

Malur03

Al diya siguién,cuan marchó ta la cocina a almorzar , sintió que deciban que la güela de casa no se heba puisto devantar , que marchaba coixa con una nafra que pa qué en la canilla. Al criato se le cheló la sangre. La viella de casa yera una bruixa…

Malur02

A rabosa y a berigüeta

11 de enero de 2013

Una berigüeta y una rabosa yeran tricolotiadas, asinas que pensón en estrapaciarse. Quedón en que cada una podeba’scarse os refuerzos que querrese. A’l diya siguién, se presentarían en l’árbol que acordón.

berigüeta01

A rabosa s’achuntó con un teixón, un lobo, un chabalín y un onso. Marchón ta o puesto que heban quedau, al canto de l’árbol. Alí estuvon asperando güens ratos, y cuan ya se’n rediban pensando de que a berigüeta no se atreviba a venir , esta se presentó con un cañuto a las costiellas.

Os animals grans, ya puez contar , se esmeligaban de risa cuan viyón que veniba sola. Pero a berigüeta les esbandió:
– ¡vienga, cuan querriaz, empecipiamos!

Con que o teixón, a rabosa, o lobo, o chabalin y l’onso se le tirón dencima, a lo que a berigüeta ubrió’l cañuto. Alabez salión d’alí un ixambre d’abelletas que fizoniaban sin parar a aquels animals. ¡Ah, mamá! ¡Que manera de reclamarse de dolor!

A la fin, o teixón, a rabosa, o lobo, o chabalín y l’onso tenión que escapar a amagarse debaixo de l’augua en una basa que i heba cerca. Aquel diya aprendión que,a veces, ¡os chicoz resultan grans!

berigüeta02

El sastre y el muxón

8 de enero de 2013

Fa muchos años, un sastre que viviba en el lugar de Sin, va dir a coser ta Chistén. Como va tener fayena a rienda, cuan va querrer tornar ta casa, ya se le heba feto de noches. Con la luna, encá se i viyeba, asinas que va emprender el camín.

sastre01

Cuan yera a metat de cursa, va pasar al canto d’un barzal y se le va enganchar la faixa. En estas que una babieca que yera lucaniando dende un árbol cantaba:
– ¡Mius, mius!

L’hombre, espantau, se pensaba que yera un ladrón que’l agazapiaba ta sacarle es diners que heba ganau. Alabez le va contestar:
– ¡Que no, que son míos, que me’s he ganau troballando!
Y la babieca, que no teneba cosa millor que fer , le competiba:
– ¡Mius, mius!

sastre02

Asinas van estar toda la noche, basta que al rayar l’alba, el sastre va viyer a la babieca que se le’n rediba de como l’heba feto tontiar. L’hombre le va esbandir:
– Me pensabe que yera un ladrón, ¡y resulta que yere enganchau en un barzal con una babieca féndome la cinguanga! Si en vez de estar una barza allegas a estar un hombre, ¡te foto una pantegada!

sastre03

El gato Chenaro

6 de enero de 2013

I heba una vez un gato en una casa d’un lugar. Le deciban Chenaro, e toz es diyas se’n baixaba ta una femera a fer caca e pis.

Un diya, el engalzó una rabosa e le soltó:
-¡Chenaro, te voi a minchar!

Chenaro01

E Chenaro le contestó:
– Ay, pobret, soi flaquizo de tot. No mes tiengo güesos. Mira, esta semana matarán el latón en casa. Una miqueta que me’n den e una miqueta que les ne pille, ¡me engordaré y alabez si que tendrás mes carne!

La rabosa que no sabeba que fer, a la fin dició:
—Bueno, bueno, pos marcha.

A la semana tornó la rabosa per la femera, pero el gato que no i yera. Se’n fue e tornó al diya siguién, pero tampó el trobó. Chenaro que no baixaba per alí. Dica un maitín que le dio per asomarse a la casa, y el viyó que yera chetato al sol en el mirador. La rabosa le dició:
—Chenaro, ¿qué no vas agora ta la femera?
Y el gato le esbandió:
—¡No, no! ¡Agora me foi caca e pis dentro de casa!

Chenaro02

El chanrualla

4 de enero de 2013

I heba una vez una nina que se deciba Marieta. Un diya gandaniando per la Selva de San Chuan se va trobar a una bestia mui fieriza que le va soltar:
– Hola, como te dices? Yo soi el Chanrualla.
Marieta le va responder:
– Hola, yo me digo Marieta.
– ¡Oh!¡Que nombre mes pincho! -va contestar el Chanrualla- Puez peinarme ta sacarme es piollos? Soi rabiando ya fa diyas y no i trobo qui me’l faya. Y si tiens bela coseta ta minchar, tamién me faría honra.
El chanrrualla se va acochar en la mandileta de Marieta. De tan a gusto que i yera, Al ratet se va trespasar.

Chanrualla01

En ixas que la nina va pensar:
– ¡Mama mía, que espanto mes gran! A viyer si puedo fuyir d’aquí sin que se de encuenta… Me sacaré la mandileta poquet a poquet…
Y alabez, va marchar a amagarse ta casa. El Chanrualla, al rato va despertarse.
– ¡Uaaaaaah! ¿An ye ixa zagaleta? Ha marchau sin decir cosa, y aquí se ha deixau la mandileta. Le seguiré el bayo, ta saber ta’n ha pegau. ¡Hola! ¡Y que fambre tiengo! ¡Ixa mesacha no m’ha dau cosa de minchar! Marietaaaa, toma la mandiletaaa.
Y el Chanrualla, que va esnabesar dezaga d’ella.
La nina, que yera mui espantada, ya feba ratos que heba tancau la puerta de casa con clau y se heba ficau en la cama. En estas que va allegar el Chanrualla.
– ¿Qui ha zarrau esta puerta? Ya puez contar que ixo me parará.
La bestia, d’un empentón, que se va foter ta’entro. Ascape va marchar cara ta las escaleras, y deciba:
– Marieeetaaaa, ya puyo la primera escalereetaa. Marieeetaaaa, ya puyo la segunda escalereetaa. Marieeetaaaa, ya puyo al rellaneeet.
Al allegar ta la puerta de la alcoba de Marieta continaba salamoniando:
– Marieeeetaaaa, ya te toco es pebeeez. Marieeeetaaaa, ya te toco la pancheta. Marieeeetaaaa, ya soy aquí… ¡ÑAAAAAM!
Y de un bocau, se la va tragar. Asinas acaba este cuento, que dimpués de contau, per la chubinera s’ha escapau.

Chanrualla02

Cinco vriolins y cinco mixins

2 de enero de 2013

I heba rudio en la falsa,

alto al cabo la casa.

Alabez puyón t’alí.

Viyón a cinco mixins

tocando cinco vriolins.

No yera un.

No yeran dos.

Ni yeran tres.

Ni yeran cuatro.

I heba rudio en la falsa,

alto al cabo la casa.

Alabez puyón t’alí.

Viyón a cinco mixins

tocando cinco vriolins.

5mixins01


A %d blogueros les gusta esto: