Archive for 30 noviembre 2010

Mostrugos per las bals

30 de noviembre de 2010

Estes diyas son fendo mostrugos con las partes del cuerpo. Solo de pensar que me trobase un d’estes per la carrera… Pasaz ta la galería a biyer-los punchando en la imachen.

Anuncios

Tringol

29 de noviembre de 2010

Astí tenez la canzión de la Orquestina del Fabirol que ban cantar el atro diya es ninos.

Cuan yera chiquinín
qué feba el gatolín?
L’aprestabe una caixa
ta que i fese pipí;
dimpués de prebatinas
-mama firme chilar-,
enzertó a la fin dentro…
ya eba aprendiu a pixar!

Tiengo un mixín en casa
que le digo Tringol,
Tringol ye un buen amigo
y d’es gatos campión.

Un diya que tenebe
“nozilla” ta brendar
ta si le feba goi
le’n boi dar a prebar.
Prou que si le’n feba…
y como ba dixar
el pote laminando
sin caler-lo fregar!

Tiengo un mixín en casa
que le digo Tringol,
Tringol ye un buen amigo
y d’es gatos campión.

Ta que no le fizasen
piollos ni polegons,
un diya ta la bañera
me’l boi llebar con yo.
Ba fuyir zabucando
xampús, potes, sabons…
y encara toz s’alcuerdan
d’ixa reboluzión!

Tiengo un mixín en casa
que le digo Tringol,
Tringol ye un buen amigo
y d’es gatos campión.

Tringol ye cazataire,
en ye un d’es millors,
y como contrimuestra
trai ratos y muixons.
Pero él i fa seguntes
la suya educazión
y a cazata nos dixa
denzima el cobertor!

Asinas ye iste gato,
asinas ye Tringol,
enchugardiu y libre…
y asinas quiero yo.

Una miqueta tarde, pero…

23 de noviembre de 2010

..ixo ye lo que i hai. U escribo en el blog, u preparo las clases, que ixo del aragonés no conoixe lo que son es libros de testo ta no más llegar a clase y enganchar. Y por la cuenta que me traye…

L’atro diya ba estar bien la presentazión del proyeuto d”animazión Luzia Dueso. Bon tener de tot: mosica, teatro, discursos, chen,… y basta nos ban dar de brendar. Que más quiers?

Bon tener a la consellera de educazión, cosa que no se beye toz es diyas per estes lugars. Ixo nos fa goi, perque paix que a la fin empezipian a tomar-se estes temas en serio dende la alministrazión.

Es ninos del C.R.A. ban estar es encargaus de meter majo el local de la Sarra con murals d’es suyos lugars, y tamién ban cantar una canzioneta de La Orquestina del Fabirol. Con Tringol, la istoria de un gato que en ba fer de todas (y que l’en ban fer!), ban acabar la presentazión. Yo cuento que el ban fer asabelo de bien, perque toz ban aplaudir a rabiar y basta ban salir en el Heraldo. Como deziban es de la Orquestina: “como no parén cuenta, esta clica nos fan blincar de la mosica!”

Proyeuto de animazión “Luzía Dueso”

11 de noviembre de 2010

Dende fa uns años i hai un proyeuto que trai actibidaz en aragonés ta las escuelas. Estiaño ye el primer que le meten el nombre de Luzia Dueso, escritora de la bal de Chistau que ba morir el zaguer Marzo.

El diya 16, a las 18:00 se fará la presentazión de la edizión d’este curso en la Sarra de San Chuan. Tos asperán.

Entremistanto, la clica del Zinca-Zinqueta ye aprestando bela coseta ta rezibir el acto. Ya berez, ya.

Chistén


A %d blogueros les gusta esto: