La clica del Zinca-Zinqueta

El cuento de nunca acabar

laclica — Sat, 14 Jan 2012 11:52:02 +0000

Ya sabén que a’s ninos de infantil les fa mucho goi sentir cuentos, y que si per ellos estase, nunca en tendrían prou. Ta apañar el problema, no cal más que emplegar el cuento que hen feto en clase. Alí podén biyer tot lo que fan es chicoz cada diya en casa y en la escuela. Ixo sí, el que el tienga que leer, que se prepare, que cuan paix que s’acaba, torna ta la empezipiadura. Ta ratos en tiene…

Click to view slideshow.

La ringlera del tiempo

laclica — Fri, 06 Jan 2012 16:46:01 +0000

Ya fa diyas que bon rematar isto, pero no me ha bagau de meter-lo per internet basta agora. Y una mica más y ni an el puedo fer ta las bacazions…

Bueno, que sepiaz que no hen estau paraus dende octubre, y bon empezipiar el curso con un mural gran an bon troballar el paso del tiempo. D’ixa traza es niños ban fer-se una mica a la idea de como corren es años, y de lo poco que hen bibiú nusatros la bida d’estes lugars. I hai muchas casas que en ca i tienen en el portal l’año en que las ban fer, y tamién tenén fotos ta saber como yera la chen de fa 100 años u menos. De la chen de tiempos más d’antes ye difízil saber cosas, pero si mirán en es cuadros d’es museos, tamién podén fer-nos una idea. Como nusatros no en tenén a mano, bon aprobechar es tablets de clase ta esforigar en google a biyer que trobaben.

Hala, en uns diyas nos entrepuzan per ixas carreras, que las bacazions ya casi nos las hen bufau de tot. Feliz año!

L’orache

laclica — Mon, 17 Oct 2011 17:31:13 +0000

Caldrá empezipiar a meter lo que fon en clase con es ninos, si no, ba a paixer que no más son tot el diya mirando ta’l sol!

Lo primer que hen troballau con es más chicorrons ha estau conoixer l’orache que fa per estes lugars. Tenén sol, boiras, nieu, tronadas, aire, bela pedregada… Con tot ixo hen chugau a trobar las parellas. Con las fichas cara t’abaixo, cal chirar-ne dos. Si son iguals, te las quedas, y si no, pasa el turno ta l’atro. Asinas basta que s’acaban.

Pero tamién hen feto uns imans ta meter en las neberas. Berdat que fan majo?

Click to view slideshow.

Contina el proyeuto Luzía Dueso

laclica — Fri, 07 Oct 2011 13:16:35 +0000

Fa uns diyas se ba boziar que el departamento de educazión feba plegar las actibidaz d’es proyectos culturals en catalán y aragonés Jesus Moncada y Luzía Dueso. A la fin, no más el han feto con el programa catalán, y de momento contina el d’aragonés.

Esperán que ta el curso que biene no’l saquen, perque este proyecto premite trayer a las nuestras escuelas actibidaz que d’atra traza no podrín tener per el puesto an que son y la custión economica. Me pienso yo que i hai atros gastos en la alministrazión an pueden retallar, que no son menister y que son prou más caros que estes…

Cal fer-se biyer

laclica — Sat, 01 Oct 2011 15:59:50 +0000

Sin dar-nos en cuenta, ya llebán un mes d’escuela y encara no hebe pasau pe’l blog. Entremistanto bon troballando cosetas en clase ta saca-las per aquí, he feto cuentas de facebook y twitter ta’l que le sia más a man seguir-nos per ixes puestos. El tenez astí alto en la dreta, chunto a la sindicazión (rss). No me choca guaire istas webs de alparziar sin sustanzia, pero u te puyas a la web 2.0 de tot, u te espaldas pe’l camín y dimpués no i hai traza de seguir las marchas modernas.

Nos bon quedar mocaus

laclica — Sun, 28 Aug 2011 17:36:12 +0000

Bueno, no bon allegar a tanto. A la fin no ba poder estar y es ganadors del concurso de bitacoras de la Somonparty ban estar “Mamis y Bebés” en la categoría cheneral, y “Purnas en o Cierzo” en la de millor del Alto Aragón. Les dan la enorabuena, y son contentos de que isto haiga baliu ta que se conoixca una miqueta más que el aragonés ye dentro de la escuela. Au, me’n torno a apurar las bacazions, que ya no’n queda garra…

Son finalistas de la Somonparty

laclica — Fri, 26 Aug 2011 17:42:19 +0000

A la fin con es botos de toz busatros hen quedau entre es 10 primers. Grazias per la buestra aduya! A biyer en que queda tot isto… Maitíns tos digo bela cosa. Entremistanto la Somonparty ya ha empezipiau. I hai actibidaz ta tot el cabo de semana.

Apurando las bacazions

laclica — Thu, 11 Aug 2011 13:50:02 +0000

Paixeba que estarían larguismas y ya son casi zabucadas… No más escribo ta dezir que ta’l 1 de Setiembre la Clica del Zinca-Zinqueta tornará a dar ferrete ta’l curso 2011-2012. A biyer que fon iste año ta fer marchar l’aragonés per ixas bals. De momento ya tiengo bela cosa bullindo en el crabazín…

¡Ah! Dinantes que se me olbide, l’atro diya leendo sobrarbenses me ba dar per presentar el blog al concurso de bitacoras de la somonparty. Si querrez botar per nusatros, y que se sepa bela cosa más de lo que charrán per aquí, no tenez más que punchar debaixo.

Y cuento contau…per la chubinera se ha escapau!

laclica — Tue, 28 Jun 2011 09:16:37 +0000

Nos ne bon de bacazions, sí, pero no nos podeben dir sin fer una miqueta de despedida. Bon emplegar belas falorias d’ixas que se feban al canto del fogaril ta fer comedia con moñacos de papel. A biyer si ta la proxima bez tiengo tiempo ta fer-ne belún más, que “L’arangután de las Paniellas”, “El sastre y el muixón” y “El chanrrualla” ya han nabegau per casi tot el Sobrarbe.

Click to view slideshow.

Buen berano y no pasez guaire calor. A biyer si nos tornán a trobar luego per istas bals!

Ixe soi yo!

laclica — Tue, 21 Jun 2011 21:22:03 +0000

Click to view slideshow.

Es ninos de infantil han estau tot el zaguer trimestre replegando el suyo cuerpo en la maleta ta dir-se-ne de bacazions. Un cuentet ta conoixer que tienen crabazín, mans, garras, peus… De seguro les ha feto gois as suyos pais, perque han troballau firme!