U más bien unas caras. Con el cuento de que boi fer con Pilar Benítez unas autibidaz ta troballar con las partes del cuerpo, agora soi con es críos guerriando con ixo. Tot lo que fon sale de una falorieta que se me ba ocurrir emplegando es bideochuegos, que me chocan abundante (y as ninos asabelo!). De primeras, hen pintau como si belas partes de la cara estasen graficos de ordenador, y con un powerpoint dimpués hen chugau una miqueta con es suyos nombres ta aprender-los.
Ta rematar-lo hen feto caras que fan un miedo que ta qué.
Como toz es años, el “Proyeuto de animazión arredol d’a luenga e a cultura aragonesa” ba tornar ta la escuela. El diziembre pasau nos ba benir a beyer Felix A.Rivas con “Yo bibo astí”. Nos ba dezir como yeran las casas inantes, como son en atros puestos y tamién bon beyer de que son fetos es tellaus d’antis y de agora.
Ixo podriz pensar-ye de beyer que el blog no ha feto patas en estes meses. Pues en la escuela no hen parau, lo que pasa ye que entre unas cosas y atras, no me ha bagau de escribir per aquí.
Lo zaguer que bon fer ye saber una miqueta más de como son las bruxas.
Es más chicoz ban pintar y recortar uns debuixos ta fer uns murals:
Es grans, que les fa abundante goi toquinear es ordenadors, ban emplegar es suyos debuixos ta aprestar uns powerpoints. Podez beyer beluns a continazión:
Ya fa diyas que bon acabar las clases d’aragonés, pero en ca tenebe cosetas ta fer una zaguera entrada. Es ninos ban escurrir belas falorias con uns presonaches y lugars que les boy dezir. Bruxas, prenzipes, prinzesas y dragons se ban apasiar per el castiello de L’Ainsa, el dolmen de Tella y basta per bel ibón ta capuzase con la calor.
L’atro diya nos ban fer una besita Ángel y Toche. Ellos son “A Chaminera” y ban benir con el “Procheuto d’animazión arredol d’a luenga e a cultura aragonesa”. La suya autibidaz se diz “Fendo matematicas”, y ye un taller ta aprender matematicas con chuegos, cantas, adibinetas…
Astí tenez unas fotos con es ninos que fan aragonés.
Cuan empezipiaba el curso es ninos d’aragonés se ban fer un chuego ta ellos que se diz “Qui ye qui”. Tiens que estar dos ta chugar, y cal adobinar el animal que se le entrefila al atro. Si quiers fer-te-ne un, puez baixar-te lo preziso de aquí. Tiens basta una caixeta ta replegar-te toz es animals.
¿Cómo se chuga? Bien fázil. Primer espardes es bichos per la mesa. Dimpués bas fendo preguntas un al detrás de l’atro a las que sólo puez dezir “sí” u “no”:
¿Tiene coda?
¿Tiene orellas?
¿Ye gran?
…
Seguntes lo que diga l’atro, bas replegando es animals que beigas que no cumplen con lo que preguntes. Cuan sepas seguro cualo ye el animal de l’atro, el dizes. Si enziertas, ganas, y si no, pierdes la bez.
os bichos de “Qui ye qui”:
auca, petré, zapo,teixón, paniquesa, ixingardana, bobón, güella, saltapraus, can, berigüeta, apaput, chizardo, rabosa, limaco, coniello, pulz, gurrión, relemeco, mixín, babieca, aliga, falcón, craba.
